Sa renditet LVV-ja në rezultatet paraprake të DnV për zgjedhjet e 7 qershorit?
Demokracia në Veprim publikon rezultatet preliminare të zgjedhjeve të 7 qershorit, me rënie të ndjeshme të pjesëmarrjes.
PRISHTINË — Demokracia në Veprim (DnV) ka publikuar rezultatet preliminare të zgjedhjeve të parakohshme parlamentare të 7 qershorit 2026, bazuar në 75% të mostrës së procesit të vëzhguar. Sipas këtyre të dhënave, Lëvizja Vetëvendosje del e para me 42.7% (±1.7%) të votave, e ndjekur nga Partia Demokratike e Kosovës me 21.5% (±1.6%) dhe Lidhja Demokratike e Kosovës me 17.7% (±1.1%).
Pas tyre renditen Aleanca për Ardhmërinë e Kosovës me 7.1% (±1.1%) dhe Lista Serbe me 6.4% (±2.0%). SPO ka marrë 0.8% (±0.2%). DnV thekson se në këto rezultate nuk përfshihen votat me kusht dhe ato nga diaspora, ndërsa pragu zgjedhor prej 5% aplikohet për subjektet që nuk garojnë për vendet e rezervuara.
Dalja e përgjithshme në votime është 37%, që paraqet rënie krahasuar me 45% në dhjetor 2025 dhe 48.78% në zgjedhjet e vitit 2021. DnV raporton se një nga sfidat kryesore ka qenë vështirësia e votuesve për të gjetur qendrën e saktë të votimit, pavarësisht njoftimeve paraprake të KQZ-së. Është vërejtur edhe rënie e rasteve të votimit me asistencë, të cilën organizata e lidh me zbatimin më të rreptë të rregullave.
Organizata u ka bërë thirrje subjekteve politike që të përmbahen nga shpalljet apo festimet e parakohshme, duke theksuar nevojën për respektim të plotë të procesit deri në certifikimin përfundimtar të rezultateve.
Burim: Zëri
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.