Pse ka vonuar rihapja e Galerisë Kombëtare pavarësisht 1.7 milionë eurove?

PRISHTINË — Rinovimi i Galerisë Kombëtare të Kosovës (GKK) ka tejkaluar vlerën fillestare të kontratës, duke arritur në gati 1.7 milionë euro, pa që institucioni të ketë ende një datë të caktuar për rihapje.

Kontrata e lidhur në prill 2025 me vlerë 1 milion e 474 mijë euro nuk ka mjaftuar. Kanë dalë dy punë shtesë: rikyçja në rrjetin elektrik, e mbyllur me 18 mijë e 400 euro përmes thirrjes së hapur, dhe punë shtesë ndërtimi e negociuar me grupin e kompanive zbatuese për 123 mijë e 603 euro. Në total, shpenzimet shtesë arrijnë 142 mijë euro, duke e çuar koston në 1 milion e 676 mijë e 546 euro.

Punimet shtesë përfshijnë demontimin e sistemit të klimatizimit, prerjen e betonit të pllakës së kulmit dhe të mureve, si dhe montimin e kanaleve ujëmbledhëse lineare të parafabrikuara, sipas dosjes së tenderit.

Objekti i GKK-së, i themeluar më 1979 dhe që funksionon në këtë ndërtesë brenda kampusit të Universitetit të Prishtinës që nga viti 1999, po rrumbullakon një vit qëkur është mbyllur. Institucioni e ka cilësuar këtë vit "një kapitull të ri në historinë e tij, jo vetëm në zgjerimin e kapaciteteve fizike", por nuk ka dhënë afat rihapijeje.

Ushtruesja e detyrës së drejtorit, Alisa Gojani, dhe Ministria e Kulturës nuk i janë përgjigjur pyetjeve të gazetës KOHA për arsyet e punimeve shtesë dhe datën e përfundimit.

Ky tejkalim i buxhetit nuk është rast i izoluar. Në fillim të vitit 2025, KOHA raportoi mospërputhje midis çmimeve të tenderëve dhe planeve buxhetore të Ministrisë së Kulturës. Për GKK-në, Ligji mbi ndarjet buxhetore 2025 parashikonte vetëm 500 mijë euro, ndërsa tenderi ishte hapur për vlerë disa herë më të madhe. Në buxhetin e këtij viti figurojnë 600 mijë euro si bartje nga viti i kaluar.

GKK-ja ka ndërruar hapësirat që nga viti i kaluar për shkak të renovimit, duke u zhvendosur në "Galerinë e Vogël" — ish-Galeria e Ministrisë së Kulturës, e njohur si "Qafa". Për vitin 2026, institucioni ka planifikuar ekspozita retrospektive të akademikut Xhevdet Xhafa dhe ekspozitë personale të Doruntina Kastratit, me përgatitje që kanë nisur në vitin 2025.

Burim: Koha.net
— Redaksia ZHURMA