Gana fiton 1-0 Panamën në minutën e 95-të

PRISHTINË — Kombëtarja e Ganës e nisi me fitore rrugëtimin në Kupën e Botës 2026, duke mposhtur Panamanë me rezultat minimal 1-0 në ndeshjen e Grupit L. Goli i vetëm i takimit u realizua në minutën e pestë të kohës shtesë, kur Caleb Yirenkyi përfitoi nga një kundërsulm i shpejtë.

Panamaja dominoi pjesën e parë. Që në minutën e dytë Waterman krijoi një rast të shkëlqyer, por portieri Lawrence Ati-Zigi reagoi mrekullueshëm. Amerikanolatinët kontrolluan posedimin dhe kërkuan penallti në minutën e 33-të pas rrëzimit të Martinezit, por gjyqtari nuk akordoi asgjë. Pak para pushimit, Zigi pësoi lëndim në kofshë dhe u zëvendësua nga Asare.

Në pjesën e dytë, Gana u shfaq më e rrezikshme. Panamaja humbi rastin më të mirë në minutën e 60-të kur Martinez nuk arriti të gjejë rrjetën nga pozitë ideale. Më pas, Ramos ndërhyri në momentin e fundit për të ndalur Jordan Ayew-n, ndërsa një gjuajtje tjetër e Panamasë përfundoi pranë shtyllës.

Kur dukej se ndeshja do të mbyllej pa gola, në minutën e 95-të Brandon Thomas-Asante depërtoi nga krahu i majtë dhe pasoi në shtyllën e dytë, ku Yirenkyi nuk e pati të vështirë të shënonte. Pas vërshëllimës pati tensione mes lojtarëve. Me këtë fitore, Gana siguron tri pikët e para në Grupin L, ndërsa Panamaja mbetet pa pikë pavarësisht paraqitjes së mirë.

Burim: Telegrafi, https://telegrafi.com/nje-kundersulm-vendos-gjithcka-gana-rremben-tri-piket-ne-fund-ndaj-panamase/
— Redaksia ZHURMA