Pse u ndal njëësia A3 e Termocentralit Kosova A?
Njësia A3 e Termocentralit Kosova A ndalet sonte për sanim të rrjedhjeve në sistemin gypor të kaldajës.
PRISHTINË — Korporata Energjetike e Kosovës (KEK) ka njoftuar se njësia A3 e Termocentralit Kosova A do të nënshtrohet ndalimit të kontrolluar sonte, rreth orës 00:00, për shkak të rrjedhjeve të evidentuara në sistemin gypor të kaldajës.
Vendimi është marrë nga menaxhmenti dhe stafi profesional pas monitorimit të vazhdueshëm të gjendjes teknike, me vlerësimin se vazhdimi i operimit mund të shkaktojë dëmtime më të mëdha në pajisje. KEK-u sqaron se ndalimi do të bëhet "në mënyrë të planifikuar dhe në përputhje me standardet teknike dhe të sigurisë operative", ndërsa ekipet e mirëmbajtjes janë në gatishmëri të plotë për të filluar sanimin sapo të krijohen kushtet e sigurisë.
Kjo njësi ishte rikthyer në operim më 2 prill 2026, pas sanimit të rrjedhjeve të njëjta në fund të marsit, dhe kishte operuar në mënyrë të qëndrueshme për rreth 58 ditë. KEK-u e cilëson këtë rezultat si dëshmi të "profesionalizmit dhe përkushtimit" të ekipeve, duke pasur parasysh vjetërsinë e njësisë dhe ngarkesën e vazhdueshme operative.
Burim: Zëri
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.