Pse rikthimi i Muriqit në Turqi varet nga zgjedhjet e Fenerbahçes?
Sulmuesi i Kosovës pranon kontratë deri më 2029, por transferimi varet nga zgjedhjet presidenciale të Fenerbahçes.
PRISHTINË — Sulmuesi i Kombëtares së Kosovës, Vedat Muriqi, mund të rikthehet në futbollin turk gjatë kësaj vere. Sipas gazetarit turk Yagiz Sabuncuoglu, kandidati për president të Fenerbahçes, Aziz Yildirim, ka arritur marrëveshje me Real Mallorcan dhe me vetë futbollistin për transferimin e tij.
Raportohet se Muriqi ka pranuar një kontratë deri në verën e vitit 2029, por gjithçka varet nga zgjedhjet presidenciale që do të mbahen këtë fundjavë te gjiganti turk. Në rast se Yildirim nuk fiton, marrëveshja mund të mos realizohet.
Fillimisht, Mallorca kishte vendosur një çmim prej 18 milionë eurosh për "Piratin", por sipas mediave turke, vetë Muriqi i ka kërkuar drejtorit sportiv Pablo Ortells që të lehtësojë largimin e tij. Përfaqësuesit e Yildirim kanë udhëtuar drejt Palma de Mallorcas për të finalizuar detajet.
Një detaj interesant: Real Mallorca zotëron 100% të kartonit të Muriqit, por ish-klubi i tij, Lazio, përfiton 45% nga çdo shitje e ardhshme e sulmuesit kosovar. Mallorca e bleu Muriqin për rreth 8 milionë euro, ndërsa tani synon ta shesë për 18 milionë euro.
Burim: Zëri
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.