Si përfitoi 39 mijë euro zyrtari i Kllokotit pa shkuar në punë?
I dyshuari S.S. përfitoi pagë pa shkuar në punë për gati shtatë vjet si zyrtar për kulturë dhe menaxher biblioteke.
GJILAN — Prokuroria Themelore në Gjilan ka ndaluar një zyrtar komunal të Kllokotit të dyshuar për keqpërdorim të pozitës zyrtare. Departamenti për Krime të Rënda, në bashkëpunim me DKKO-në, e ndaloi të dyshuarin me inicialet S.S. pas hetimeve dhe aplikimit të masave të veçanta hetimore.
Sipas Prokurorisë, i dyshuari ishte i punësuar nga viti 2019 deri më 2 mars 2026 si zyrtar për kulturë, rini dhe sport, si dhe menaxher i bibliotekës së Kllokotit. Ai dyshohet se me dashje nuk është paraqitur në vendin e punës dhe nuk ka ushtruar aktivitetet e parapara me kontratë, ndërkohë që ka vazhduar të përfitojë pagë mujore nga buxheti i shtetit.
Dëmi i shkaktuar buxhetit të Kosovës vlerësohet në 39.231,21 euro. Prokuroria njoftoi se do të kërkojë masë për sigurimin e pranisë së të dyshuarit në procedurë pranë Gjykatës Themelore në Gjilan brenda afateve ligjore.
Burim: Zëri
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.