Si mbron Rama Zvërnecin me 4 miliardë euro pa leje ndërtimi?

ROMË — Kryeministri Edi Rama mori pjesë sot në Forumin Botëror Future Investment Initiative (FII) në Romë, ku u pyet nga CNN-ja lidhur me projektin e Zvërnecit. Para prezantueses Eleni Giokos, Rama e mbrojti investimin si "investimin më të madh në turizëm në mbarë Europën", me vlerë 4 miliardë euro.

Kryeministri nisi me tre pohime: vlerësimi i ndikimit në mjedis është në proces, nuk ka projekt të miratuar dhe nuk ka leje ndërtimi. Por vijoi: "Nuk ka asgjë për të shqetësuar asnjë ambientalist që mendon si duhet." Toka, sipas tij, është private dhe e blerë nga investuesit.

Rama vendosi Zvërnecin brenda një narrative ekonomike. Kur mori detyrën, Shqipëria kishte PBB nën 10 miliardë euro dhe rreth 2 milionë turistë. Vitin e kaluar, PBB-ja i kaloi 27 miliardët dhe turistët shkuan mbi 12 milionë — rritje gjashtëfishe në pak mbi një dekadë.

Investimet direkte ndoqën të njëjtën trajektore: nga 300 milionë euro kur Rama mori detyrën, në 1.6 miliardë vitin e kaluar. Kryeministri ia atribuoi këtë kthesë edhe ardhjes së Mohamed Alabbar, "vizionar i madh nga Lindja e Mesme", i cili sipas tij e bëri Shqipërinë vend që "njerëzit nisën ta shihnin ndryshe".

Ndaj protestuesve kundër projektit, Rama mbajti qëndrim të papritur: i quajti "të jashtëzakonshme". "Fakti që ka njerëz në Shqipëri sot që dalin në rrugë dhe protestojnë në emër të natyrës, në emër të mbrojtjes së zogjve, është e jashtëzakonshme", tha ai, duke e parë si shenjë maturimi për një vend që dikur ishte destinacion gjuetie pa asnjë kontroll.

Rama premtoi edhe impakt mjedisor pozitiv: projekti synon 25% gjelbërim më shumë se sa sot, ndërkohë që ujërat e ndotura të lagunës do të pastrohen. "Zogjtë, ujërat, pemët dhe gjithçka tjetër do të jenë shumë më mirë", deklaroi kryeministri, duke theksuar se "arkitektët, peizazhistët dhe inxhinierët më të mirë" janë përfshirë në zhvillim.

E megjithatë, gjendja ligjore mbetet ashtu siç e la Rama vetë: pa projekt të miratuar, pa leje ndërtimi. Forumet ndërkombëtare japin premtime; procedurat vendase do të kenë fjalën e fundit.

Burim: ATSH
— Redaksia ZHURMA