Pse u kthyen specat kosovarë nga Finlanda dhe ç'rrezik paraqesin?
Një ngarkesë specash të bluar nga Kosova u ndalua në kufirin e Finlandës pasi zbuloi 92,5 µg/kg Ochratoxin A, katër herë mbi normën e lejuar.
PRISHTINË — Sistemi i Alarmit të BE-së për Ushqim dhe Pajisje (RASFF) ka njoftuar se më 12 maj, një ngarkesë specash të bluar nga Kosova u ndalua në kufirin e Finlandës. Analiza zbuloi mbetje mykotoksine Ochratoxin A në nivel prej 92,5 µg/kg, ndërsa norma e lejuar është 20 µg/kg — një tejkalim prej më shumë se katër herë.
Autoritetet finlandaze e konsideruan rrezik serioz për konsumatorët dhe urdhëruan kthimin e ngarkesës në vendin e origjinës. Speci, i bluar apo jo, është ndër produktet më të konsumuara në Kosovë.
Nga Agjencia e Ushqimit dhe Veterinarisë së Kosovës nuk ka pasur asnjë njoftim zyrtar për këtë rast. Pa transparencë institucionale, ekziston rreziku që e njëjta ngarkesë të rishitet në tregun vendas. Asnjë informacion nuk është bërë i ditur as për kontrolle të mundshme në kompaninë eksportuese.
Autoriteti Evropian i Sigurisë Ushqimore (EFSA) ka konfirmuar më herët se OTA mund të jetë gjenotoksike — dëmton drejtpërdrejt ADN-në — dhe kancerogjene për veshkën. Ekspertët kanë llogaritur një kufi ekspozimi (MOE) që tregon shqetësim shëndetësor për shumicën e grupeve të konsumatorëve.
Burim: Zëri, http://www.zeri.info/aktuale/623398/speca-te-bluar-nga-kosova-me-mykotoksinen-ochratoxin-a-zbulohen-ne-finlande/
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.