Si po e çon PD zërin e protestës në Parlamentin Europian?

STRASBURG — Deputetja e PD-së dhe nënkryetarja e Komisionit të Posaçëm të Stabilizim-Asocimit, Jorida Tabaku, ndodhet sot në Strasburg, teksa Parlamenti Europian diskuton progres-raportin për Shqipërinë. Ajo zhvillon takime me eurodeputetë dhe përfaqësues të grupeve politike, duke përfshirë jo vetëm Grupin e Partive Popullore Europiane (EPP), por edhe grupe të tjera.

Ajo shoqërohet nga kreu i Grupit Parlamentar të PD-së, Gazment Bardhi, dhe nënkryetari i Kuvendit, Agron Gjekmarkaj.

Në një videomesazh nga Strasburgu, Tabaku theksoi se çështjet për të cilat qytetarët po protestojnë prej ditësh në Tiranë janë transmetuar tek eurodeputetët. Ajo argumentoi se shumë prej tyre nuk janë tema të reja për institucionet europiane, por shqetësime të përsëritura ndër vite në raportet e PE-së dhe të BE-së për Shqipërinë. "Çështjet për të cilat protestuesit kanë mbushur rrugët e Tiranës janë po ato çështje që prej vitesh gjenden në raportet e Parlamentit Europian. Ligji i Investimeve Strategjike, Ligji i Zonave të Mbrojtura, korrupsioni, lufta kundër krimit të organizuar dhe mungesa e mundësive për të rinjtë janë njëkohësisht çështje të Shqipërisë dhe të Europës", u shpreh ajo.

"Zëri i qytetarëve që protestojnë po sillet sot në Parlamentin Europian dhe do të jetë pjesë e debatit parlamentar për Shqipërinë", vijoi Tabaku. "Sot po sjellim në Parlamentin Europian edhe zërin e qytetarëve që protestojnë në rrugët e Tiranës kundër një sistemi të padrejtë, pa transparencë dhe pa llogaridhënie."

Tabaku argumentoi se Shqipëria po ndjek "rrugën e një autokracie elektorale apo të një shteti të kapur që miraton ligje me porosi dhe në funksion të interesave të një pakice", në vend të modelit europian të shtetit ligjor dhe transparencës. Ajo nënvizoi se protesta e qytetarëve përfaqëson kundërshtimin ndaj këtij modeli qeverisjeje dhe ndaj një sistemi që, sipas saj, ka funksionuar në dëm të shumicës së shqiptarëve.

Sipas saj, qëllimi i takimeve është që shqetësimet për shtetin e së drejtës, demokracinë dhe transparencën të jenë pjesë e diskutimeve dhe debatit parlamentar europian për të ardhmen e Shqipërisë dhe procesin e integrimit në Bashkimin Europian.

Opozita po kërkon të kthejë presionin e rrugës në presion institucional — duke i lidhur protestat e Tiranës me agjendën zyrtare të hapjes së negociatave.

Burim: BalkanWeb
— Redaksia ZHURMA