Çfarë kërkon Jeton Zulfaj në Helsinki për rrugëtimin e Kosovës?
Kryenegociatori Jeton Zulfaj ka takuar në Helsinki ministrin finlandez Joakim Strand për të diskutuar statusin e vendit kandidat dhe negociatat me BE-në.
HELSINKI — Kryenegociatori i Republikës së Kosovës me Bashkimin Evropian, Jeton Zulfaj, është takuar në Helsinki me Ministrin për Çështje Evropiane të Finlandës, Joakim Strand. Në këtë takim palët kanë diskutuar për procesin e integrimit evropian të Kosovës.
Në këtë takim morën pjesë edhe zyrtarë të tjerë nga pala finlandeze. Ndër ta ishin Drejtoresha e Përgjithshme dhe Sekretarja e Shtetit për Çështje të BE-së në Zyrën e Kryeministrit të Finlandës, Minna Kivimäki, si dhe këshilltari i lartë i ministrit, Alexander Strand.
Gjithashtu, pjesë e takimit ishin edhe zyrtari Lang dhe udhëheqësja e ekipit, Inkeri Virttanen-Abernethy. Statusi i vendit kandidat dhe hapja e negociatave për anëtarësim në Bashkimin Evropian ishin temat kryesore të diskutimit ndërmjet kryenegociatorit kosovar dhe zyrtarëve finlandezë.
Zulfaj falënderoi Finlandën për mbështetjen e vazhdueshme ndaj Kosovës dhe kontributin e saj në shtetndërtim dhe zhvillim, duke kërkuar përkrahje aktive për anëtarësim në BE. Ai theksoi progresin në sundimin e ligjit, institucionet demokratike, sigurinë dhe zhvillimin ekonomik.
Sipas tij, ky progres dhe harmonizimi me Politikën e Jashtme dhe të Sigurisë të BE-së e bëjnë Kosovën të denjë për statusin kandidat. Përfaqësuesit finlandezë rikonfirmuan mbështetjen për perspektivën evropiane, por nënvizuan se anëtarësimi duhet të bazohet në meritë dhe kritere.
Burim: Ekonomia Online
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.